TILKYNNINGAR OG FRÓÐLEIKUR

17. Nóvember 2003

SÓTTVARNARAÐSTAÐA FYRIR GÆLUDÝR Á KEFLAVÍKURFLUGVELLI TEKIN Í NOTKUN - MYNDIR

Á Keflavíkurflugvelli hefur verið tekin í notkun sóttvarnaraðstaða fyrir gæludýr sem flutt eru til landsins. Aðstaðan er til húsa í vöruhúsnæði IGS og var innréttuð nú í haust fyrir tilstuðlan embættis yfirdýralæknis í samræmi við reglugerð um innflutning gæludýra og hundasæðis sem sett var af landbúnaðarráðherra í júní á þessu ári.

Við komu dýranna til landsins skulu þau flutt rakleiðis í aðstöðuna þar sem þau eru skoðuð af héraðsdýralækni eða fulltrúa hans ásamt starfsmönnum tollgæslunnar. Héraðsdýralæknir skal sannreyna að dýrin sýni ekki einkenni smitsjúkdóms, hafi innflutningsleyfi og samþykki yfirdýralæknis. Að skoðun lokinni eru hundar og kettir fluttir áfram til Hríseyjar þar sem þau dvelja í 4 vikur í einangrun. Sóttvarnaraðstaðan, sem er um 30 fermetrar að stærð, er tvískipt og í innra herbergi eru fjögur búr, það stærsta er 150x75x93 cm að stærð. Þegar dýrin eru tekin úr flutningsbúrum sínum til skoðunar er þeim brynnt og búrin þrifin, sé þess þörf. Ef tafir verða á flutningi dýranna til Hríseyjar eru þau vistuð í aðstöðunni og þau fóðruð. Ítrustu smitvarna skal gætt í sóttvarnaraðstöðunni og heimsóknir eigenda eru óheimilar.

Auk breytinga á heilbrigðiskröfum og styttingar á einangrun var sú breyting gerð með áðurnefndri reglugerð að öll dýr sem dvelja samtímis í einangrunarstöð, skulu tekin inn í stöðina á nokkurra daga tímabili og útskrifuð 28 dögum seinna. Einangrunarstöðinni í Hrísey verður skipt í tvær aðskildar deildir og dýrin verða því tekin inn í tveimur hópum 2 tiltekna daga tvisvar sinnum í mánuði. Þetta ber að hafa í huga þegar innflutningur hunda og katta er undirbúinn (nánari upplýsingar um dagsetningar er að finna hér).

Á meðan dvöl í einangrun stendur eru dýrin skoðuð reglulega af dýralækni stöðvarinnar. Tekin eru sýni til rannsókna á sníkjudýrum og fylgst með hugsanlegum einkennum smitsjúkdóma. Skömmu fyrir lok dvalarinnar eru dýrin skoðuð af héraðsdýralækni sem sannreynir að öllum reglum um innflutning og einangrun gæludýra hafi verið fylgt.

Smellið hér til að sjá myndir af sóttvarnaraðstöðunni

Nánari upplýsingar um innflutning hunda og katta